JE!!wajua!!!!!Matokeo kinyume yanayotokana na siasa hasi za Saudi Arabia

Mwenendo wa siasa hasi za Saudi Arabia yakiwemo mashambulizi yake ya kichokozi nchini Yemen na kupungua kwa bei ya mafuta katika soko la dunia, ni mambo yaliyoiletea nchi hiyo matokeo yaliyo kinyume na matarajio yake ya awali. Shirika la ndege la Saudia limetangaza kuwa, kutokana na mashambulizi ya jeshi la Yemen na wapiganaji wa kujitolea wa taifa hilo katika maeneo ya mpakani, safari za ndani na nje katika viwanja vya ndege vya miji ya Jazan, Abha, Wadi Aldwasir, Bishah, Sharorah na Najran, hadi zimesimamishwa hadi pale litakapotolewa tangazo jipya baadaye. Tangu Mfalme Salman bin Abdulaziz Al Saud aingie madarakani nchini Saudia, siasa za nje za nchi hiyo zimegeuka na kuwa za uvamizi na mashambulizi. Siasa za uvamizi za utawala wa Aal-Saud zilianzia huko Yemen hapo tarehe 26 mwezi Machi mwaka huu. Watawala wa Riyadh walidhani kwamba, vita dhidi ya Yemen vingemalizika ndani ya muda mfupi sana, hata hivyo miezi mitano na nusu imepita sasa ambapo si tu kwamba Saudia imeshindwa kufikia hata mafanikio madogo katika vita hivyo, bali pia mgogoro wenyewe wa Yemen umehatarisha usalama wa utawala wa Aal-Saud. Katika mbadiliko mapya kabisa, wapiganaji wa Harakati ya Kiislamu ya Answarullah na jeshi la Yemen, wamevurumisha makombora kadhaa katika maeneo ya mpakani ya Saudia na hivyo kulitia hasara kubwa jeshi la nchi hiyo. Gadi ya ikulu ya rais wa Yemen pia imetangaza kuwa, ikiwa mashambulizi ya Saudia yataendelea, basi haitasita kutumia makombora yake ya masafa marefu kuishambulia miji kadhaa ya Saudia, ukiwamo mji mkuu wa nchi hiyo Riyadh. Katika radiamali juu ya tishio hilo la viongozi wa Yemen, serikali ya Riyadh, imeamua kufunga viwanja vyake vya ndege katika miji ya kusini mwa nchi kwa kuhofia kushambuliwa na makombora hayo ya masafa marefu. Kwa msingi huo tunaweza kusema kuwa, vita vya Saudi Arabia dhidi ya taifa la Yemen, kinyume na malengo ya kuinua nafasi ya watawala wa nchi hiyo, vimesababisha uharibifu mkubwa na mauaji ndani na nje ya nchi hiyo, na wakati huohuo kudhoofika nafasi ya mfalme huyo pamoja na mwanaye, katika fikra za raia wa Saudia na hata katika eneo. Kutokana na hasara kubwa iliyowasababishia raia wa Yemen, Riyadh imefananishwa na utawala haramu wa Kizayuni wa Israel, kiasi cha Mfalme Salman kudharauliwa katika fikra za walio wengi duniani na kutajwa kuwa jenerali mtoto. Kwa hakika hilo sio suala pekee lililouletea natija kinyume utawala wa Aal-Saud. Hatua ya utawala huo ya kushusha bei ya mafuta kwa lengo la kutoa mashanikizo kwenye uchumi wa Iran na Russia, imekuwa na natija kinyume ambapo imegeuka na kuwa kwa madhara ya utawala wa Riyadh. Katika ripoti ya hivi karibuni kabisa, Waziri wa Mafuta wa Saudia ametangaza kuwa, madhara yanayotokana na kushuka bei ya mafuta katika soko la dunia, yameifanya nchi hiyo kukabiliwa na mgogoro mkubwa wa kiuchumi. Ukweli ni kwamba, ili Saudia iweze kujionyesha kuwa taifa lenye nguvu katika eneo la Mashariki ya Kati, inahitajia kwanza kupata viongozi wenye tajriba ambao katika maamuzi yao ya siasa za kigeni, watafuata mkondo wa akili na fikra salama, kinyume na kutumia mabavu na mauaji.

(chanzo-tehranradio)

Chapisho Jipya Taarifa za zamani